ٹی20 ورلڈ کپ 2026 کا شیڈول جاری، پاک بھارت بڑا ٹاکرا 15 فروری کو ہوگا

انٹرنیشنل کرکٹ کونسل (آئی سی سی) نے ٹی20 ورلڈ کپ 2026ء کا شیڈول اور میچ وینیوز جاری کر دیے ہیں، جس کے مطابق پاک بھارت ٹاکرا 15 فروری بروز اتوار کو مقرر کیا گیا ہے۔

اعلامیے کے مطابق ایونٹ 7 فروری سے شروع ہو گا اور 8 مارچ کو فائنل احمد آباد یا کولمبو میں کھیلا جائے گا۔ پاکستان اپنے تمام میچز سری لنکا میں کھیلے گا، اور فائنل میں رسائی کی صورت میں فیصلہ کن معرکہ بھی کولمبو میں ہوگا۔

ایونٹ کے میچز نیو دہلی، ممبئی، چنئی، کولکتہ، احمد آباد، کولمبو اور کینڈی میں منعقد ہوں گے۔ پاکستان کے دیگر لیگ میچز 7، 10 اور 18 فروری کو ہوں گے۔

ٹی20 ورلڈ کپ میں 20 ٹیمیں شامل ہیں جنہیں چار گروپس میں تقسیم کیا گیا ہے۔ گروپ اے میں پاکستان، بھارت، امریکا، نیدرلینڈز اور نمیبیا شامل ہیں۔ سپر ایٹ مرحلہ 21 فروری سے یکم مارچ تک ہوگا، جبکہ سیمی فائنلز 4 اور 5 مارچ کو کولکتہ/کولمبو اور ممبئی میں کھیلے جائیں گے۔

7 سے 19 فروری تک روزانہ تین میچز شیڈول ہیں، جبکہ 20 فروری کو آسٹریلیا اور عمان کے درمیان واحد میچ ہو گا۔