سوڈان: گھر پر ڈرون حملہ میں بچوں سمیت 13 افراد ہلاک

سوڈان کے شہر العبید میں ایک گھر پر ہونے والے ڈرون حملے میں بچوں سمیت متعدد افراد جاں بحق ہوگئے۔ غیر ملکی میڈیا کے مطابق حملے کے نتیجے میں 8 بچوں سمیت 13 افراد ہلاک ہوئے، جن میں سے زیادہ تر کا تعلق ایک ہی خاندان سے بتایا جا رہا ہے۔

میڈیا رپورٹس کے مطابق یہ ڈرون حملہ نیم فوجی ریپڈ سپورٹ فورسز (RSF) کی جانب سے فوج کے زیر کنٹرول علاقے میں کیا گیا۔ تاہم تاحال کسی گروپ نے حملے کی باضابطہ ذمہ داری قبول نہیں کی۔

واضح رہے کہ سوڈان میں فوج اور ریپڈ سپورٹ فورسز کے درمیان گزشتہ کئی سالوں سے شدید کشیدگی جاری ہے، جس کے دوران اب تک ہزاروں شہری جان کی بازی ہار چکے ہیں جبکہ ملک میں انسانی بحران بھی سنگین صورت اختیار کر چکا ہے۔