آبنائے ہرمز کی صورتحال جنگ سے پہلے والی حالت میں کبھی واپس نہیں آئے گی، ترجمان ایرانی فوج

ایرانی مسلح افواج کے ترجمان بریگیڈیئر جنرل ابراہیم ذوالفقاری نے واضح کیا ہے کہ آبنائے ہرمز کی صورتحال اب 40 روزہ جنگ سے پہلے والی حالت میں کبھی واپس نہیں آئے گی۔ ایک باضابطہ بیان میں ترجمان نے کہا کہ امریکا دراصل آبنائے ہرمز پر ایران کی خودمختاری سے شدید خوف زدہ ہے، اور سچ تو یہ ہے کہ اس اہم ترین آبی گزرگاہ میں سکیورٹی کو غیر مستحکم کرنے کا اصل ذمہ دار خود امریکا ہے۔

ترجمان نے خطے کی صورتحال پر بات کرتے ہوئے انکشاف کیا کہ ایران نے برادر خلیجی ممالک سے باقاعدہ درخواست کی ہے کہ وہ امریکا کو اپنی سرزمین ایران کے خلاف جارحانہ حملوں کے لیے استعمال کرنے کی ہرگز اجازت نہ دیں۔ ابراہیم ذوالفقاری کا مزید کہنا تھا کہ اگر خطے کے ممالک امریکا کے بجائے ایران کے ساتھ تعاون کی راہ اختیار کریں، تو خطے میں پائیدار اور اجتماعی سلامتی کا ہدف آسانی سے حاصل کیا جا سکتا ہے۔

واضح رہے کہ اس سے قبل بھی ترجمان ابراہیم ذوالفقاری نے امریکا کو کڑی وارننگ دیتے ہوئے کہا تھا کہ اگر امریکی حملوں میں ایرانی انفراسٹرکچر کو نشانہ بنایا گیا تو اس کے نتائج پورے خطے کے لیے تباہ کن ہوں گے، اور ایران خطے کے انفراسٹرکچر کا ایک ایک ٹکڑا اس طرح مٹا دے گا جیسے اس کا کبھی وجود ہی نہ تھا، جس سے یہ تنازع پورے خطے کو اپنی لپیٹ میں لے لے گا۔