اسٹیٹ بینک کا آج اہم اجلاس، پالیسی ریٹ میں کمی کا امکان

اسٹیٹ بینک آف پاکستان کا آج اہم اجلاس ہونے جا رہا ہے، جس میں پالیسی ریٹ کے حوالے سے فیصلہ کیا جائے گا۔ اجلاس کے بعد گورنر اسٹیٹ بینک جمیل احمد میڈیا کو پریس کانفرنس میں بریفنگ دیں گے۔
گزشتہ اجلاس میں، پندرہ دسمبر 2025 کو، کمیٹی نے مارکیٹ کو حیران کرتے ہوئے پالیسی ریٹ میں 50 بیسس پوائنٹس کمی کر کے اسے 10.50 فیصد کر دیا تھا، کیونکہ اوسط مہنگائی 5 سے 7 فیصد کے ہدفی دائرے میں رہی تھی۔
تجزیہ کار آج کے اجلاس میں مزید مانیٹری نرمی کی توقع کر رہے ہیں اور امکان ہے کہ پالیسی ریٹ میں 50 سے 100 بیسس پوائنٹس تک کمی ہو سکتی ہے۔
معاشی ماہرین کے مطابق پاکستان کی معیشت میں بہتری کے آثار واضح ہیں، جنہیں کم ہوتی مہنگائی، بیرونی کھاتوں میں استحکام اور زرمبادلہ کے ذخائر میں اضافے سے تقویت حاصل ہوئی ہے۔