اسپیکر قومی اسمبلی نے پی ٹی آئی کو قائمہ کمیٹیوں میں واپس آنے کی دعوت دیدی

اپوزیشن کے سینیٹرز اور اراکین قومی اسمبلی نے اسپیکر قومی اسمبلی سردار ایاز صادق سے ملاقات کی ہے۔

چیئرمین بیرسٹرگوہرکی سربراہی میں پی ٹی آئی کے وفد کی اسپیکرقومی اسمبلی سے ان کے چیمبر میں ملاقات ہوئی،ملاقات میں بیرسٹر گوہر علی خان نے بانی پی ٹی آئی سے اُن کے خاندان کے افراد اور پارٹی رہنماؤں کی ملاقات نہ ہونےکا معاملہ اٹھایاکہا آپ سینیئرسیاستدان ہیں، پہلے بھی ہماری مدد کرتے رہے، اب بھی ملاقات کے لیےکردار ادا کریں۔

اسپیکر قومی اسمبلی نےکہا کہ وہ پہلے کی طرح اب بھی پی ٹی آئی اورحکومت کے درمیان پل کا کردار ادا کرنےکوتیار ہیں لیکن تحریک انصاف خود حکومت کےساتھ بیٹھنےکوتیارنہیں،ایازصادق نے پی ٹی آئی کو قائمہ کمیٹیوں میں واپس آنے کی دعوت دیدی،پارلیمان میں کرداراداکرنےکا مشورہ دیا، پی ٹی آئی رہنماؤں نےبانی سےملاقات کیلئے اسپیکر سے مدد کی درخواست کردی۔

اسپیکرقومی اسمبلی سے ملاقات میں اسد قیصر،علامہ راجہ ناصر عباس،لطیف کھوسہ،امجد علی خان، شہرام ترکئی اوردیگر رہنما شامل تھے،وفد نے اسپیکر کی حکومت اور اپوزیشن کے درمیان سہولت کاری کو سراہا۔

پی ٹی آئی رہنما اسد قیصر نےملاقات کے بعد میڈیا سے گفتگو میں کہا اسپیکر قومی اسمبلی کو پارٹی کےبنیادی مطالبات سے آگاہ کردیا،ہم چاہتے ہیں کہ بانی سے اہلخانہ اور پارٹی رہنماؤں کی ملاقات کرائی جائے،اپوزیشن لیڈرکی تقرری کا نوٹیفکیشن جاری کرنےکا مطالبہ بھی کیا ہے،اسپیکر قومی اسمبلی نے کہا ہےکہ وہ ہمیں کل تک جواب دیں گے،اگر پی ٹی آئی کےمطالبات نہ مانے گئے تو پارلیمنٹ نہیں چلنے دیں گے،اپوزیشن کا وفد پیر کے روز چیئرمین سینیٹ سے بھی ملاقات کرے گا۔