اسپیکر قومی اسمبلی سردار ایاز صادق سے برطانیہ کی ہائی کمشنر جین میریٹ کی ملاقات، دو طرفہ تعلقات اور پارلیمانی تعاون پر تبادلہ خیال

اسپیکر قومی اسمبلی سردار ایاز صادق سے برطانیہ کی ہائی کمشنر محترمہ جین میریٹ نے پارلیمنٹ ہاؤس میں ملاقات کی۔ ملاقات کے دوران دونوں فریقین نے دوطرفہ تعلقات، پارلیمانی تعاون اور علاقائی امور پر تبادلہ خیال کیا۔

اسپیکر سردار ایاز صادق نے کہا کہ پاکستان برطانیہ کے ساتھ اپنے تاریخی دوستانہ تعلقات کو بڑی اہمیت دیتا ہے اور قومی اسمبلی میں حزب اختلاف کے تمام اراکین کے ساتھ خوشگوار تعلقات قائم ہیں۔ انہوں نے برطانیہ کے تعاون سے پاکستان میں پارلیمانی کمیٹیوں کے نظام کو فعال بنانے کو سراہا اور بتایا کہ قومی اسمبلی کی تمام قائمہ کمیٹیاں مکمل طور پر فعال ہیں۔

سردار ایاز صادق نے دہشت گردی کے خلاف پاکستان کی مسلسل کوششوں، دونوں ممالک میں پارلیمانی و عوامی روابط کو فروغ دینے اور موسمیاتی تبدیلی کے عالمی چیلنجز سے نمٹنے کے لیے برطانیہ کی معاونت کو خوش آئند قرار دیا۔

اس موقع پر اسپیکر نے پارلیمان میں خواتین کے حقوق، بچوں کے تحفظ اور فلاح و بہبود کے لیے قائم پارلیمانی کمیٹیوں اور کاکس کے فعال کردار پر بھی روشنی ڈالی۔ ہائی کمشنر جین میریٹ نے اسپیکر کے بلا تفریق اراکین کے ساتھ تعاون کرنے کے طرز عمل کو سراہا۔