ٹی 20 ورلڈکپ: دوسرے سپر اوور میں جنوبی افریقہ نے افغانستان کو ہرا دیا

احمد آباد: ٹی 20 ورلڈکپ کے 13 ویں میچ میں جنوبی افریقہ نے افغانستان کو دوسرے سپر اوور میں شکست دے دی۔ نریندر مودی سٹیڈیم، احمد آباد میں کھیلے گئے میچ میں افغانستان نے ٹاس جیت کر پہلے باؤلنگ کرنے کا فیصلہ کیا۔

جنوبی افریقہ نے مقررہ 20 اوورز میں 6 وکٹوں کے نقصان پر 187 رنز بنائے، جہاں رائن ریکلٹن نے 61 اور کوئنٹن ڈی کوک نے 59 رنز بنائے، دونوں نے دوسری وکٹ کے لیے 114 رنز کی شراکت قائم کی۔ افغانستان کی جانب سے عظمت اللہ عمرزئی نے 3، کپتان راشد خان نے 2 اور فضل الحق فاروقی نے 1 وکٹ حاصل کی۔

افغانستان کی اننگز کا آغاز رحمان اللہ گرباز اور ابراہیم زادران نے کیا۔ ایک موقع پر میچ افغانستان کی جانب جھکتا نظر آیا، مگر 13 گیندوں پر 5 کھلاڑی آؤٹ ہونے کی وجہ سے افغان ٹیم 20 ویں اوور میں 187 رنز پر آؤٹ ہو گئی، جس سے میچ ٹائی ہو گیا اور سپر اوور میں پہنچ گیا۔

پہلے سپر اوور میں افغانستان نے 17 رنز بنائے، جسے جنوبی افریقہ نے آخری گیند پر چھکا لگا کر ٹائی کر دیا۔ دوسرے سپر اوور میں جنوبی افریقہ نے پہلے کھیلتے ہوئے 23 رنز بنائے، جبکہ افغانستان صرف 19 رنز بنا سکی اور میچ پروٹیز کے نام رہا۔

افغانستان کی جانب سے رحمان اللہ گرباز نے 42 گیندوں پر 87 رنز بنائے، جس میں 7 چھکے اور 4 چوکے شامل تھے، عظمت اللہ عمر زئی 22 اور راشد خان 20 رنز بنا سکے۔ جنوبی افریقہ کی جانب سے لنگی نگیڈی نے 3 وکٹیں حاصل کیں۔

قبل ازیں ٹاس کے بعد گفتگو کرتے ہوئے افغانستان کے کپتان راشد خان نے کہا کہ جیتنے کے لیے ٹیم کو مشترکہ محنت کرنی ہوگی اور پاور پلے میں بیٹنگ اور مڈل اوورز میں باؤلنگ کو بہتر بنانا ضروری ہے۔ ان کے مطابق ٹیم میں ایک تبدیلی ہوئی، ضیاءالرحمان کی جگہ نور احمد کو پلیئنگ الیون میں شامل کیا گیا۔

جنوبی افریقہ کے کپتان مارکرام نے کہا کہ ٹیم کوشش کرے گی کہ اچھے رنز بنائے، اور ایک تبدیلی کے تحت کوربن بوش کی جگہ جارج لنڈے کو پلیئنگ الیون میں شامل کیا گیا۔