فرانس میں اسکائی ڈائیونگ طیارہ گر کر تباہ، 11 افراد ہلاک

ملک کے مشرقی علاقے نینسی میں اسکائی ڈائیونگ کے لیے استعمال ہونے والا ایک طیارہ گر کر تباہ ہو گیا، جس کے نتیجے میں طیارے میں سوار تمام 11 افراد جاں بحق ہو گئے۔ خبر رساں ایجنسی کے مطابق جرمنی میں رجسٹرڈ ‘پی سی 6 پیلاٹس’ طیارے نے جیسے ہی اڑان بھری، وہ ٹیک آف کے چند ہی منٹ بعد حادثے کا شکار ہو گیا، جس کے باعث اس میں سوار تمام افراد موقع پر ہی ہلاک ہو گئے۔

رپورٹس میں بتایا گیا ہے کہ مسافروں میں کچھ ایسے افراد بھی شامل تھے جو پہلی بار ‘ٹینڈم اسکائی ڈائیونگ’ کا تجربہ کرنے جا رہے تھے، جبکہ بعض میڈیا رپورٹس کے مطابق طیارے میں تربیتی نرسیں بھی موجود تھیں۔ یہ طیارہ ایک نجی کمپنی نے ابتدائی پیراشوٹ جمپ کے لیے کرائے پر حاصل کر رکھا تھا. حکام نے طیارہ حادثے کی اصل وجوہات کا تعین کرنے کے لیے باضابطہ تحقیقات کا آغاز کر دیا ہے، تاہم جاں بحق ہونے والے افراد کی شناخت تاحال ظاہر نہیں کی گئی۔