طلبا اپنی پسند کی جیکٹ ، جرسی پہن سکتے ہیں، محکمہ تعلیم سندھ کی نجی اسکولوں کو ہدایت

محکمہ تعلیم سندھ نے تمام نجی اسکولوں کو ہدایت کی ہے کہ وہ سرد موسم کے پیشِ نظر طلبہ کے لیے یونیفارم پالیسی میں نرمی کریں اور بچوں کو مناسب گرم لباس پہننے کی مکمل اجازت دیں۔

یہ ہدایت ڈائریکٹوریٹ آف انسپیکشن اینڈ رجسٹریشن آف پرائیویٹ انسٹیٹیوشنز سندھ کی ایڈیشنل ڈائریکٹر رجسٹریشن پروفیسر رفیعہ ملاح کی جانب سے جاری کی گئی ہے۔ اعلامیے کے مطابق اسکول انتظامیہ کو چاہیے کہ وہ طلبہ کو سوئٹر، جیکٹ، کوٹ، بلیزر، ٹوپی، موزے اور ضرورت کے مطابق کسی بھی قسم کا گرم لباس پہننے کی اجازت دے۔

اعلامیے میں مزید کہا گیا ہے کہ اسکول انتظامیہ اس ہدایت پر ’’اصل روح‘‘ کے مطابق عمل کرے اور موسمِ سرما کے دوران گرم کپڑوں کے حوالے سے کسی قسم کی پابندی عائد نہ کرے، تاکہ طلبہ سرد موسم کی شدت سے محفوظ رہ سکیں اور ان کی صحت اور آرام متاثر نہ ہو۔