سندھ کے سیلاب متاثرین سے وعدے کی تکمیل کا دن، 10 لاکھ گھر تعمیر کرلیے: مراد علی شاہ

وزیراعلیٰ سندھ سید مراد علی شاہ نے سندھ پیپلز ہاؤسنگ پروگرام (SPHF) کے تحت سیلاب متاثرین کے لیے 10 لاکھ موسمیاتی اثرات سے محفوظ گھروں کی تعمیر مکمل ہونے کا اعلان کرتے ہوئے اسے تاریخی سنگِ میل قرار دیا ہے۔ کراچی میں تقریب سے خطاب کرتے ہوئے انہوں نے بتایا کہ صوبے کے 23 اضلاع میں کل 21 لاکھ گھروں کی تعمیر کا ہدف مقرر ہے، جن کی جیو ٹیگنگ اور ڈیجیٹل مانیٹرنگ کے ذریعے شفاف تصدیق کی گئی ہے۔ اس پروجیکٹ کے لیے عالمی بینک نے 50 کروڑ ڈالر اور سندھ حکومت نے 17 کروڑ 90 لاکھ ڈالر فراہم کیے، جبکہ دیگر عالمی مالیاتی اداروں کا تعاون بھی حاصل رہا۔ وزیراعلیٰ نے خاص طور پر اجاگر کیا کہ اس منصوبے کے ذریعے دیہی سندھ کی لاکھوں خواتین کو اپنے گھروں کے مالکانہ حقوق دیے گئے ہیں۔ انہوں نے مزید بتایا کہ 4 ہزار 800 دیہات میں ایک ارب ڈالر کی مشترکہ سرمایہ کاری سے صاف پانی اور سینیٹیشن کے منصوبوں پر بھی کام جاری ہے۔