جماعت اسلامی کا 29 نومبر کو مینار پاکستان پر جلسے کا اعلان

امیر جماعت اسلامی حافظ نعیم الرحمٰن نے اعلان کیا ہے کہ پٹرولیم لیوی کے مکمل خاتمے تک جماعت اسلامی احتجاج سے پیچھے نہیں ہٹے گی، جس سلسلے میں 22 نومبر کو کوئٹہ اور 29 نومبر کو مینار پاکستان لاہور میں تاریخی جلسہ عام منعقد کیا جائے گا۔ منصورہ میں پریس کانفرنس کرتے ہوئے انہوں نے کہا کہ پٹرولیم مصنوعات کی قیمتوں میں حالیہ کمی جماعت اسلامی کے عوامی دباؤ کا نتیجہ ہے، تاہم ابھی ڈیڑھ کروڑ مستحقین کے علاوہ 1300 سی سی گاڑیوں، ٹریکٹر اور پبلک ٹرانسپورٹ کو بھی ریلیف ملنا چاہیے۔ انہوں نے تجاویز دیتے ہوئے کہا کہ 1800 سی سی سے بڑی گاڑیوں اور حکمران طبقات کی عیاشیوں پر امپورٹ ٹیکس اور لیوی منتقل کر کے عام عوام کو ریلیف دیا جائے۔ حافظ نعیم نے مزید کہا کہ ملک میں ریفائنریز، چینی، گیس اور آئی پی پیز مافیا کا کارٹیل قائم ہے، جبکہ پنجاب میں تعلیم اور زراعت کو شدید نقصان پہنچایا گیا ہے۔