پاکستان کو ایل این جی درآمد کے لئے مہنگی ترین بولیاں موصول

پاکستان کی آئندہ دو ماہ (دسمبر اور جنوری) کے لیے مائع قدرتی گیس (ایل این جی) کی اسپاٹ درآمد شدید گرانی کی زد میں آ گئی ہے، جہاں عالمی سپلائرز نے درآمدی بولیوں میں بھاری نرخ طلب کر لیے ہیں۔ پاکستان ایل این جی لمیٹڈ (پی ایل ایل) کے جاری کردہ اعداد و شمار کے مطابق بین الاقوامی کمپنیوں نے ایک ایل این جی کارگو کے لیے کم از کم 24 ارب 28 کروڑ 16 لاکھ روپے جبکہ بلند ترین نرخ 27 ارب 77 کروڑ 60 لاکھ روپے تک مقرر کیے ہیں۔ ذرائع کے مطابق دو کارگوز کے لیے کم ترین نرخ پیش کرنے والی کمپنیوں (24 ارب 28 کروڑ سے 24 ارب 43 کروڑ روپے) کی بولیاں پی ایل ایل بورڈ کو بھیج دی گئی ہیں۔ اب پی ایل ایل بورڈ تمام پیشکشوں کا جائزہ لے کر ملکی مفاد کے تحت ان بولیوں کو قبول یا مسترد کرنے کا حتمی فیصلہ کرے گا۔