واشنگٹن نے کوئی غلط اندازہ لگایا تو ایران کا جواب فوری اور جارحانہ ہوگا، قالیباف

ایران کی پارلیمنٹ کے اسپیکر محمد باقر قالیباف نے امریکا کو سخت خبردار کرتے ہوئے کہا ہے کہ اگر واشنگٹن نے کوئی غلط اندازہ لگایا تو ایران کی جانب سے فوری، سخت اور جارحانہ جواب دیا جائے گا۔

نیم سرکاری خبر رساں ادارے ‘تسنیم’ کے مطابق پاسدارانِ انقلاب کی ایرو اسپیس فورس کے نئے زیرِ زمین ‘میزائل سٹی’ کی رونمائی کی تقریب سے خطاب کرتے ہوئے محمد باقر قالیباف نے کہا کہ دشمن کی کسی بھی غلطی کی صورت میں ایرانی مسلح افواج ممکنہ تنازع کے جغرافیائی دائرے کا تعین خود کریں گی۔

انہوں نے واضح کیا کہ اس نئے میزائل سٹی کی رونمائی دشمنوں کے لیے ایک کھُلا اور واضح پیغام ہے، کیونکہ جنگ کی کیفیات اور خطرات کے باوجود ایران اپنی دفاعی اور عسکری صلاحیتوں کو جدید تر بنانے سے ایک لمحے کے لیے بھی غافل نہیں ہوا ہے۔ باقر قالیباف کا مزید کہنا تھا کہ یہ کامیابی ایرانی عوام کے اس پختہ عزم کا اظہار ہے کہ وہ اپنے ملک کی خودمختاری، سلامتی اور علاقائی سالمیت کے دفاع کے لیے ہر حد تک جائیں گے۔