مذہب کے نام پر تشدد قبول نہیں، سازشوں کے خلاف کھڑے ہیں: علماء و مشائخ

راولپنڈی: چیف آف ڈیفنس فورسز فیلڈ مارشل سید عاصم منیر سے فقہ جعفریہ کے ممتاز علمائے کرام اور مشائخ نے ایک اہم ملاقات کی ہے، جس میں قومی یگانگت، ملکی استحکام اور دفاعِ وطن کے لیے مشترکہ عزم کا اعادہ کیا گیا۔ ملاقات کے دوران علمائے کرام نے مذہب کے نام پر تشدد کی بھرپور مذمت کرتے ہوئے واضح کیا کہ ملک میں امن و امان کے قیام کے لیے تمام مکاتب فکر ریاست اور سکیورٹی اداروں کے شانہ بشانہ کھڑے ہیں۔

ملاقات کے بعد جاری کردہ خصوصی پیغامات میں وحدت علمائے اسلام کے چیئرمین مولانا زاہد عباس کاظمی نے کہا کہ دہشت گردی کے خلاف جنگ صرف فوج کی نہیں بلکہ پورے ملک کی جنگ ہے، ہم ہر محاذ پر پاک فوج کے ساتھ ہیں۔ علامہ شبیر حسن میثمی اور علامہ عارف واحدی نے پاکستان کو عالمِ اسلام کا فخر قرار دیتے ہوئے کہا کہ افغانستان کی حالیہ بلا اشتعال جارحیت اور ‘فتنہ الخوارج’ جیسی سازشوں کا مقابلہ پوری قوم مل کر کرے گی۔

علماء نے شہدائے پاکستان کی قربانیوں کو زبردست خراجِ عقیدت پیش کیا اور نوجوانوں پر زور دیا کہ وہ کسی بھی ریاست مخالف سرگرمی کا حصہ نہ بنیں۔ مولانا الطاف حسین نے اعلان کیا کہ دفاعِ وطن کے لیے ہر گاؤں سے 20 افراد محاذ پر افواج کے ساتھ لڑنے کے لیے تیار ہیں۔ علامہ محمد حسین نجفی نے پیغام دیا کہ اسلام کی بقا پاکستان کی مضبوطی میں پنہاں ہے۔ ملاقات کے اختتام پر ملکی سلامتی اور شہداء کے درجات کی بلندی کے لیے خصوصی دعا کی گئی۔