پاکستانی و لبنانی وزرائے اعظم کی ملاقات، تعلقات مزید مضبوط بنانے کے عزم کا اعادہ

وزیراعظم محمد شہباز شریف کی اقوامِ متحدہ کی جنرل اسمبلی کے اجلاس کے موقع پر نیویارک میں جمہوریہ لبنان کے وزیراعظم نواف سلام سے اعلیٰ سطح کی ملاقات ہوئی ہے، جس میں دونوں رہنماؤں نے پاکستان اور لبنان کے مابین قائم دیرینہ، تاریخی اور برادرانہ تعلقات کو مزید مضبوط بنانے کے مشترکہ عزم کا اعادہ کیا۔

ملاقات میں گفتگو کرتے ہوئے وزیراعظم شہباز شریف نے لبنان کی خودمختاری، سیاسی آزادی، اتحاد اور علاقائی سالمیت کے لیے پاکستان کی مستقل اور اصولی حمایت کو دہرایا۔ انہوں نے مقبوضہ لبنانی علاقوں سے اسرائیلی افواج کے فوری و مکمل انخلا اور اقوامِ متحدہ کی سلامتی کونسل کی متعلقہ قراردادوں پر روح کے مطابق مکمل عمل درآمد پر زور دیا۔ اس کے علاوہ دونوں وزرائے اعظم نے اعلیٰ سطحی سفارتی رابطوں، تجارت، سرمایہ کاری، دفاع اور ادارہ جاتی تعاون سمیت متعدد شعبوں میں دوطرفہ شراکت داری کو مزید فروغ دینے کے عملی طریقوں پر تفصیلی تبادلہ خیال کیا۔