شہباز شریف کی بحرین کے بادشاہ سے ملاقات، سیاسی و اقتصادی تعاون مزید بڑھانے پر اتفاق

وزیراعظم شہباز شریف نے بحرین کے بادشاہ حمد بن عیسیٰ الخلیفہ سے ملاقات کی جس میں سیاسی، اقتصادی، دفاعی اور ثقافتی شعبوں میں تعاون مزید بڑھانے پر اتفاق کیا گیا۔
وزیراعظم دو روزہ سرکاری دورے پر بحرین میں موجود ہیں جہاں مناما میں ہونے والی ملاقات میں دونوں رہنماؤں نے مضبوط اور تاریخی شراکت داری پر گفتگو کی۔

شہباز شریف نے شاندار استقبال پر بحرین کی قیادت کا شکریہ ادا کیا اور دیرینہ خیرسگالی کے جذبات کو سراہا۔ ملاقات کے دوران بحرین کے بادشاہ نے وزیراعظم کو ’آرڈر آف بحرین‘ کا اعلیٰ ترین اعزاز پیش کیا۔
بادشاہ حمد بن عیسیٰ الخلیفہ نے بتایا کہ تاریخی ریکارڈ کے مطابق قائداعظم محمد علی جناح بحرین کے قانونی مشیر کے طور پر خدمات انجام دے چکے ہیں جو بحرین کے لیے باعثِ فخر ہے۔

دوطرفہ تعلقات کے مختلف شعبوں میں پیش رفت کا جائزہ لیا گیا اور باہمی احترام و مشترکہ ایمان پر مبنی تعلقات کو مزید مضبوط بنانے کے عزم کا اعادہ ہوا۔
وزیراعظم نے اسلام آباد میں کنگ حمد یونیورسٹی کے قیام میں تعاون پر بحرین کا شکریہ ادا کرتے ہوئے تجارت اور سرمایہ کاری میں وسعت دینے کی خواہش کا اظہار کیا۔

شہباز شریف نے کہا کہ پاکستان، جی سی سی فری ٹریڈ ایگریمنٹ کے ساتھ دوطرفہ تجارت بڑھانے کے لیے تیار ہے۔ انہوں نے بحرینی سرمایہ کاروں کو پاکستان میں مزید سرمایہ کاری کے مواقع تلاش کرنے کی دعوت بھی دی۔
وزیراعظم نے بحرین میں مقیم ڈیڑھ لاکھ سے زائد پاکستانیوں کی مہمان نوازی پر بھی بحرینی قیادت کا شکریہ ادا کیا۔

ملاقات میں دفاعی شراکت داری کی اہمیت پر زور دیتے ہوئے تکنیکی تربیت، لاجسٹکس، افرادی قوت اور دفاعی پیداوار میں تعاون بڑھانے پر اتفاق کیا گیا۔
دونوں رہنماؤں نے غزہ کی صورتحال پر بھی گفتگو کی اور خطے میں امن و استحکام کی ضرورت پر زور دیا۔
اس عزم کا اظہار کیا گیا کہ وزیراعظم کا یہ دورہ دوطرفہ دوستی اور تعاون کو نئی مضبوطی دے گا۔