ایم کیو ایم قیادت جو زبان استعمال کر رہی ہے وہ ناقابل برداشت ہے: شرجیل میمن

سندھ کے سینئر وزیر اور رہنما پاکستان پیپلز پارٹی شرجیل انعام میمن نے ایم کیو ایم پاکستان کے رہنماؤں کی حالیہ پریس کانفرنس پر شدید ردِعمل کا اظہار کرتے ہوئے کہا ہے کہ ایم کیو ایم کی قیادت جو زبان استعمال کر رہی ہے وہ ناقابلِ برداشت ہے۔ اپنے ایک سخت بیان میں انہوں نے الزام عائد کیا کہ ایم کیو ایم شہر میں ایک بار پھر فتنہ، افراتفری اور 90ء کی دہائی والی پرتشدد سیاست واپس لانا چاہتی ہے، تاہم حکومتِ سندھ اور عوام ان کی اس سازش کو مکمل طور پر ناکام بنائیں گے۔ شرجیل میمن نے مصطفیٰ کمال اور خالد مقبول صدیقی کو تنقید کا نشانہ بناتے ہوئے کہا کہ وہ کراچی کے امن کو داؤ پر لگانے کے لیے پرانی سیاسی راہ اختیار کر رہے ہیں۔

سینئر صوبائی وزیر نے مزید کہا کہ کراچی کو بھتہ خوری، بوری بند لاشوں، اغوا برائے تاوان اور جلاؤ گھیراؤ کی سیاست ایم کیو ایم نے ہی دی تھی۔ انہوں نے کہا کہ سندھ اسمبلی صوبے کی تقسیم کے خلاف اور صوبائی خودمختاری کے حوالے سے اپنا واضح فیصلہ قرارداد کے ذریعے دے چکی ہے۔ شرجیل انعام میمن کا کہنا تھا کہ ایم کیو ایم لسانی بنیادوں پر ایک بار پھر نفرت کے بیج بونا چاہتی ہے، جبکہ کراچی میں رہنے والے اردو بولنے والوں کی اکثریت خود کو سچا سندھی سمجھتی ہے اور نفرت کی اس سیاست کو یکسر مسترد کرتی ہے۔