شہباز گل پر انڈے پھینکنے کا کیس، 5 سال بعد لیگی کارکنوں پر فردِ جرم عائد

لاہور ہائیکورٹ میں پاکستان تحریک انصاف (پی ٹی آئی) کے رہنما شہباز گل پر پیشی کے دوران سیاہی اور انڈے پھینکنے کے کیس میں اہم پیش رفت سامنے آئی ہے، جہاں واقعے کے تقریباً پانچ سال بعد ملزمان پر فرد جرم عائد کر دی گئی ہے۔ لاہور میں جوڈیشل مجسٹریٹ سعد الرحمان نے مقدمے کی سماعت کی، جس میں عدالتی حکم پر نامزد مسلم لیگ (ن) کے کارکنان غلام عباس اور طارق جٹ سمیت دیگر ملزمان نے پیش ہو کر حاضری مکمل کروائی۔ سماعت کے دوران ملزمان کو چارج شیٹ پڑھ کر سنائی گئی، تاہم انہوں نے صحتِ جرم سے انکار کیا، جس پر عدالت نے لیگی کارکنوں غلام عباس اور طارق جٹ پر باقاعدہ فرد جرم عائد کر دی۔ عدالت نے ملزمان کے انکار کے بعد استغاثہ کے گواہان کو آئندہ سماعت پر طلب کرتے ہوئے کیس کی کارروائی ملتوی کر دی ہے۔ یاد رہے کہ یہ مقدمہ اس وقت سرکاری مدعیت میں درج کیا گیا تھا جب لاہور ہائیکورٹ کے احاطے میں شہباز گل پر سیاہی اور انڈے پھینکے گئے تھے اور اس واقعے کی ویڈیوز بھی سوشل میڈیا پر وائرل ہوئی تھیں۔