شاہ محمود قریشی طبی معائنے کیلئے کوٹ لکھپت جیل سے پی آئی سی منتقل

کوٹ لکھپت جیل لاہور میں قید پاکستان تحریک انصاف کے سینئر رہنما اور سابق وزیر خارجہ شاہ محمود قریشی کو طبیعت خراب ہونے پر تفصیلی معائنے اور ٹیسٹوں کے لیے پنجاب انسٹیٹیوٹ آف کارڈیالوجی (پی آئی سی) منتقل کر دیا گیا ہے۔ ذرائع کے مطابق چند روز قبل جیل کی بیرک میں چہل قدمی کے دوران چکر آنے کے باعث وہ زمین پر گر پڑے تھے، جس سے ان کے گھٹنے اور بازو پر شدید چوٹیں آئیں۔ واقعے کے فوراً بعد جیل انتظامیہ نے ابتدائی طبی امداد فراہم کی اور ان کے خون کے نمونے شوکت خانم ہسپتال تجزیے کے لیے بھجوائے تھے۔ تاہم اب دل اور عمومی صحت کے مزید معائنے کے لیے انہیں پی آئی سی منتقل کیا گیا ہے جہاں ماہر ڈاکٹرز کی ٹیم ان کی مختلف میڈیکل رپورٹس اور ٹیسٹوں کا جائزہ لے رہی ہے۔