پنجاب میں سیکورٹی سخت؛ وزیراعلیٰ مریم نواز شریف کے اہم اقدامات کا اعلان

وزیراعلیٰ پنجاب مریم نواز شریف نے صوبے بھر میں امن و امان کی صورتحال مزید بہتر بنانے کے لیے بڑے پیمانے پر سیکیورٹی اقدامات کا اعلان کر دیا ہے۔ وزیرِاعلیٰ نے ہدایت کی ہے کہ تمام اسکولوں اور تعلیمی اداروں کے باہر ڈیجیٹل نگرانی کے کیمرے فوری طور پر نصب کیے جائیں جبکہ پنجاب پولیس کو اسکول ایجوکیشن ڈیپارٹمنٹ کے ساتھ مل کر فرضی حفاظتی مشقیں کرانے کا بھی حکم دیا گیا ہے۔
وزیراعلیٰ نے واضح کیا کہ تعلیمی اداروں میں سیکورٹی گارڈ، انٹری چیکنگ اور سی سی ٹی وی کیمروں کی موجودگی لازمی ہو گی۔ اس کے علاوہ پنجاب سے دوسرے صوبوں میں آنے جانے والی بسوں کے ڈرائیور اور عملے کی کمپیوٹرائزڈ رجسٹریشن کا فیصلہ بھی کیا گیا ہے۔
حکومتِ پنجاب نے پولیس اور قانون نافذ کرنے والے اداروں کو موٹروے پولیس سے سیکیورٹی تعاون بڑھانے کی ہدایت کی ہے۔ صوبے بھر کے پارکس میں بھی ڈیجیٹل مانیٹرنگ اور سیکورٹی سسٹمز کو بہتر بنانے کا فیصلہ کیا گیا ہے۔ سیف سٹی اتھارٹی کو تمام شہروں میں لگے کیمروں کا فنکشنل ری ویو کرنے اور لاہور، راولپنڈی سمیت ہر شہر میں سی سی ٹی وی کوریج یقینی بنانے کی ہدایت جاری کر دی گئی ہے۔
مزید برآں گھروں، بازاروں اور مارکیٹوں میں نصب سی سی ٹی وی کیمروں کو سیف سٹی سسٹم کے ساتھ منسلک کرنے کا حکم بھی جاری کیا گیا ہے تاکہ مشکوک عناصر کی بروقت نشاندہی ہو سکے۔ وزیراعلیٰ نے سماج دشمن عناصر کے خلاف کومبنگ آپریشنز جاری رکھنے کی بھی ہدایت کی۔
پنجاب میں مقیم دوسرے صوبوں کے شہریوں کا کمپیوٹرائزڈ ریکارڈ مرتب کیا جائے گا تاکہ غیر قانونی افغان باشندوں اور دیگر شہریوں میں واضح فرق کیا جا سکے۔ متعلقہ علاقوں کے ڈپٹی کمشنرز اور ڈی پی اوز کو مقامی عمائدین سے مستقل رابطے میں رہنے کی ہدایت بھی جاری کی گئی ہے۔
وزیراعلیٰ مریم نواز شریف نے کہا کہ “پنجاب میں کوئی بھی نمایاں عوامی مقام ڈیجیٹل نگرانی سے خالی نہیں ہونا چاہیے۔” ان کا کہنا تھا کہ وہ صوبے کو ملک کا محفوظ ترین صوبہ بنانے تک چین سے نہیں بیٹھیں گی۔
مریم نواز نے شہریوں سے اپیل کی کہ وہ اپنے اردگرد مشکوک افراد اور سرگرمیوں پر نظر رکھیں اور کسی بھی غیر معمولی صورتحال کی صورت میں 15 پر فوری اطلاع دیں۔
وزیراعلیٰ نے مجموعی امن و امان کی صورتحال پر اطمینان کا اظہار کرتے ہوئے پولیس اور قانون نافذ کرنے والے اداروں کو مشنری جذبے سے کام جاری رکھنے کی ہدایت کی۔