نئے صوبوں کے معاملے پر بانی پی ٹی آئی سے مشاورت ہونی چاہئے: سلمان اکرم راجہ

پاکستان تحریکِ انصاف (پی ٹی آئی) کے سیکرٹری جنرل سلمان اکرم راجہ نے کہا ہے کہ ملک میں نئے صوبوں کے قیام سے متعلق جو بازگشت سنائی دے رہی ہے اس پر ملک کی سب سے بڑی نمائندہ جماعت کے سربراہ بانی پی ٹی آئی عمران خان سے مشاورت ہونی چاہیے، کیونکہ ان کی رضامندی کے بغیر کوئی بھی بات آگے نہیں بڑھ سکتی۔ ایک نجی ٹی وی کے پروگرام میں گفتگو کرتے ہوئے سلمان اکرم راجہ نے کہا کہ ابھی تک مجوزہ آئینی ترمیم کا متن بھی سامنے نہیں آیا تاہم بانی پی ٹی آئی اپنے اصولوں کے برعکس کوئی سمجھوتہ نہیں کریں گے، اور انہوں نے واضح پیغام دیا ہے کہ جس نے بھی کوئی بات کرنی ہے وہ براہِ راست ان سے کرے۔ انہوں نے ملاقاتوں کے طریقہ کار پر تحفظات کا اظہار کرتے ہوئے کہا کہ صرف ایک رکنِ قومی اسمبلی کی ملاقات کافی نہیں بلکہ پارٹی قیادت کی بانی سے ملاقات ضروری ہے، تاہم بانی کی دی گئی فہرست کے بجائے من پسند نام شامل کیے جاتے ہیں اور بار بار ایک ہی نام بھیجے جانے سے شکوک و شبہات جنم لیتے ہیں۔ اپنے عہدے سے متعلق قیاس آرائیوں کو مسترد کرتے ہوئے سلمان اکرم راجہ نے دوٹوک الفاظ میں کہا کہ بعض لوگوں کی چھوٹی موٹی خواہشات ضرور ہیں لیکن وہ کہیں نہیں جا رہے، انہیں بانی پی ٹی آئی نے خود بلا کر یہ ذمہ داری سونپی تھی اور وہ آخری دم تک ان کے نظریے اور بیانیے کی حفاظت کرتے رہیں گے۔