خیبرپختونخوا میں سکیورٹی فورسز کی زمینی و فضائی کارروائی، 37 دہشت گرد ہلاک

وفاقی وزارتِ اطلاعات و نشریات کے مطابق سیکیورٹی فورسز نے خیبر پختونخوا کے تین شہروں کوہاٹ، ہنگو اور ٹل سمیت پاک افغان سرحدی علاقوں میں انٹیلی جنس بیسڈ زمینی و فضائی آپریشنز کے دوران 37 دہشت گردوں (خوارج) کو ہلاک کر دیا ہے۔ رپورٹ کے مطابق خیبر پختونخوا میں حالیہ دہشت گردانہ حملوں کے بعد فورسز نے 20 ستمبر کو منظم زمینی کارروائی کرتے ہوئے 9 خوارج کو جہنم واصل کیا، جس کے بعد دہشت گردوں کے ٹھکانوں اور محفوظ پناہ گاہوں کے خلاف محدود اور ہدفی فضائی حملے کیے گئے۔

ترجمان کے مطابق افغانستان سے ملحقہ سرحدی علاقے میں ‘فتنہ الخوارج’ کے تین اہم ٹھکانوں اور خودکش بمباروں کے تربیتی مرکز کو تباہ کر دیا گیا، جس کے نتیجے میں متعدد خودکش بمباروں سمیت 28 دہشت گرد مارے گئے جبکہ ان کا اسلحہ اور گولہ بارود کا ذخیرہ بھی تباہ ہو گیا۔ وزارتِ اطلاعات نے واضح کیا کہ پاکستان کو درپیش دہشت گردی کے خطرات کا سرچشمہ افغانستان سے جڑا ہوا ہے، تاہم آپریشن ‘عزمِ استحکام’ کے تحت انسدادِ دہشت گردی مہم ‘غضب لِلحق’ پوری رفتار سے جاری رہے گی تاکہ ملک سے غیر ملکی سرپرستی میں چلنے والی دہشت گردی کا مکمل خاتمہ ممکن بنایا جا سکے۔