سٹیٹ بینک کو آئی ایم ایف سے 1.3 ارب ڈالر موصول

اسٹیٹ بینک آف پاکستان نے عالمی مالیاتی فنڈ (آئی ایم ایف) کی جانب سے 1.3 ارب ڈالر کی قسط موصول ہونے کی تصدیق کر دی ہے۔ اسٹیٹ بینک کے اعلامیے کے مطابق یہ رقم توسیعی فنڈ سہولت (EFF) اور لچک و پائیداری کی سہولت (RSF) پروگراموں کے تحت منتقل کی گئی ہے۔ آئی ایم ایف کے ایگزیکٹو بورڈ نے 8 مئی کو ہونے والے تیسرے جائزے کے بعد اس قسط کی منظوری دی تھی، جس میں 760 ملین ایس ڈی آر اور آر ایس ایف کے تحت 154 ملین ایس ڈی آر شامل ہیں۔ یہ رقم 15 مئی 2026 کو ختم ہونے والے ہفتے کے سرکاری زرمبادلہ ذخائر کی رپورٹ میں ظاہر کی جائے گی۔ آئی ایم ایف کے اس حالیہ پروگرام کے تحت اب تک پاکستان کو مجموعی طور پر 4.6 ارب ڈالر جاری ہو چکے ہیں، جس سے ملکی معیشت اور زرمبادلہ کے ذخائر کو اہم سہارا ملے گا۔