آبنائے ہرمز اور باب المندب کا بلیک میلنگ کیلئے استعمال ناقابلِ قبول : سعودیہ وزیرِ خارجہ

سعودی وزیر خارجہ شہزادہ فیصل بن فرحان نے اقوام متحدہ کی جنرل اسمبلی کے اجلاس سے خطاب کرتے ہوئے دوٹوک الفاظ میں کہا ہے کہ آبنائے ہرمز اور باب المندب جیسی اہم بین الاقوامی آبی گزرگاہوں کو بلیک میلنگ کے مقاصد کے لیے استعمال کرنا بالکل بھی قابلِ قبول نہیں ہے۔

بین الاقوامی جہاز رانی کے تحفظ کو ایک مشترکہ اور بنیادی ذمہ داری قرار دیتے ہوئے سعودی وزیر خارجہ نے زور دیا کہ مملکت ان اسٹریٹجک آبی گزرگاہوں میں بحری جہازوں کی مکمل آزادی اور سکیورٹی کی پرزور حامی ہے۔ انہوں نے انکشاف کیا کہ سعودی عرب اور خطے کے دیگر ممالک کو پہلے بھی ایرانی حملوں کا نشانہ بنایا جا چکا ہے، اس لیے سپلائی چین کے تسلسل اور عالمی توانائی کی سلامتی کے لیے ان آبی گزرگاہوں کا محفوظ رہنا انتہائی ناگزیر ہے۔

خطے کی صورتحال پر بات کرتے ہوئے فیصل بن فرحان کا کہنا تھا کہ سعودی عرب خطے میں جاری کشیدگی میں کمی لانے اور تنازعات کے پرامن حل کے لیے اٹھائے جانے والے تمام اقدامات کی بھرپور حمایت کرتا ہے، جبکہ اس کے ساتھ ساتھ اقوام متحدہ کے چارٹر کے اصولوں کی مکمل پاسداری کی بھی اشد ضرورت ہے۔ انہوں نے اس بات پر بھی زور دیا کہ پورے خطے کو بڑے پیمانے پر تباہی پھیلانے والے ہتھیاروں سے پاک کیا جانا چاہیے۔

اپنے خطاب کے دوران مشرق وسطیٰ کے دیرینہ تنازع پر گفتگو کرتے ہوئے سعودی وزیر خارجہ نے فلسطینی عوام کی جبری بے دخلی کی تمام کوششوں کو سختی سے مسترد کر دیا، اور اس بات کا اعادہ کیا کہ موجودہ عالمی برادری کو اس وقت کئی غیرمعمولی نوعیت کے سنگین چیلنجز کا سامنا ہے جن سے نبردآزما ہونے کے لیے اجتماعی اور منصفانہ اقدامات کی ضرورت ہے۔