سعودی و بحرینی وزرائے خارجہ کی ملاقات، خطے کی تازہ ترین صورتحال پر گفتگو

سعودی عرب کے وزیر خارجہ شہزادہ فیصل بن فرحان آل سعود سے بحرین کے وزیر خارجہ عبداللطیف بن راشد نے ایک اہم ملاقات کی ہے، جس میں امریکہ اور ایران کے درمیان جاری مذاکرات سمیت خطے کی تازہ ترین سیاسی و سیکیورٹی صورتحال پر تفصیلی تبادلہ خیال کیا گیا۔

سعودی وزیر خارجہ کے دفتر کی جانب سے جاری کردہ باضابطہ بیان کے مطابق، دونوں رہنماؤں نے امریکہ اور ایران کے مابین جاری سفارتی مذاکرات کے عمل اور دیگر علاقائی پیشرفت کا باریک بینی سے جائزہ لیا۔ ملاقات میں خطے میں پائیدار امن، سلامتی اور استحکام کے فروغ کے لیے دونوں ممالک کی جانب سے کی جانے والی مشترکہ کوششوں کو مزید تیز کرنے پر گفتگو کی گئی۔

 دونوں وزرائے خارجہ نے علاقائی اور بین الاقوامی تجارت کے لیے انتہائی اہم بحری راستے ‘آبنائے ہرمز’ میں جہاز رانی کی آزادی اور محفوظ بحری آمدورفت کی اہمیت پر خصوصی زور دیا اور اس کے تحفظ کے لیے اپنے پختہ عزم کا اعادہ کیا۔

 دونوں عرب رہنماؤں نے اس بات پر اتفاق کیا کہ خطے کو اس وقت سیکیورٹی کے حوالے سے متعدد چیلنجز کا سامنا ہے، جن سے نمٹنے کے لیے خلیجی ممالک کے درمیان باہمی تعاون اور ہم آہنگی کو بڑھانا وقت کی اہم ضرورت ہے۔ اس موقع پر دونوں برادر ممالک کے مابین دوطرفہ تعلقات کو مزید مضبوط بنانے کے عزم کو بھی دہرایا گیا۔