اسرائیلی وزیر کا مسجد اقصیٰ پر دھاوا، مذہبی رسومات کی ادائیگی، سعودیہ اور قطر کی شدید مذمت

سعودی عرب اور قطر نے اسرائیل کے ایک انتہا پسند وزیر اور یہودیوں کے ایک گروپ کی جانب سے مقبوضہ بیت المقدس میں واقع مسجدِ اقصیٰ کے احاطے پر دھاوا بولنے کی سخت ترین الفاظ میں مذمت کی ہے۔ بیت القدس گورنریٹ کے مطابق تقریباً 100 اسرائیلی آباد کاروں نے اسرائیلی سیکیورٹی فورسز کی کڑی نگرانی میں مسجدِ اقصیٰ کی حدود میں داخل ہو کر مذہبی رسومات ادا کیں۔ یہ واقعہ یہودیوں کے مذہبی تہوار ‘یوم کپور’ کے موقع پر پیش آیا، جس سے ایک روز قبل اسرائیلی وزیراعظم بن یامین نتن یاہو اور کابینہ کے دیگر وزرا نے بھی مشرقی بیت المقدس کے مغربی دیوار پلازہ کا دورہ کیا تھا۔

سعودی وزارتِ خارجہ نے اپنے شدید ردِعمل میں اس اقدام کو بین الاقوامی قوانین کی کھلی خلاف ورزی اور دنیا بھر کے مسلمانوں کے جذبات کو مجروح کرنے والی اشتعال انگیزی قرار دیا ہے۔ سعودی عرب نے عالمی برادری سے مطالبہ کیا کہ وہ فلسطینیوں اور ان کے مقدس مقامات کے خلاف جاری اسرائیلی تجاوزات کو روکنے کے لیے اپنا کردار ادا کرے۔ دوسری جانب قطر کی وزارتِ خارجہ نے بھی واضح کیا کہ مسجدِ اقصیٰ خالصتاً مسلمانوں کی عبادت گاہ ہے، اور بیت المقدس کی قانونی و تاریخی حیثیت کو تبدیل کرنے کی کوئی بھی یکطرفہ کوشش غیر قانونی اور ناقابلِ قبول ہے۔