حوثیوں کا یمن کے تعز اور صعدہ کے علاقوں میں سعودی فضائی حملوں کا دعویٰ

حوثی باغیوں کے ترجمان ٹی وی چینل ‘المسیرہ’ نے دعویٰ کیا ہے کہ سعودی جنگی طیاروں نے یمن کے اہم علاقوں تعز اور صعدہ میں شدید فضائی حملے کیے ہیں۔ رپورٹ کے مطابق سعودی فضائیہ نے تعز میں ان مقامات کو نشانہ بنایا جہاں ایران کے حمایت یافتہ حوثی جنگجوؤں نے حالیہ دنوں میں یمنی حکومتی فورسز کے خلاف پیشرفت کرتے ہوئے کنٹرول حاصل کیا تھا۔

بی بی سی کی رپورٹ کے مطابق المسیرہ چینل نے مزید بتایا کہ شمالی یمن میں حوثیوں کے سب سے اہم گڑھ صعدہ میں بھی منتخب اہداف پر بمباری کی گئی، جبکہ اسی صوبے کے سرحدی علاقے منبہ میں شدید توپ خانے سے فائرنگ کی گئی۔ دوسری جانب حوثی ترجمان نے دعویٰ کیا تھا کہ ان کے جنگجوؤں نے جنوبی سعودی عرب میں واقع ایک عسکری اڈے کو میزائلوں اور ڈرونز سے نشانہ بنایا ہے، تاہم سعودی حکام یا آزاد ذرائع کی جانب سے اس دعوے کی تصدیق نہیں کی گئی ہے۔