جنرل ساحر شمشاد کی صدر اور وزیراعظم سے الوداعی ملاقاتیں، خدمات کو بھرپور خراجِ تحسین

اسلام آباد: چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے اپنی مدتِ ملازمت کے اختتام سے قبل صدرِ مملکت اور وزیراعظم سے الوداعی ملاقاتیں کیں۔

ایوانِ صدر میں ہونے والی ملاقات میں صدر آصف علی زرداری نے جنرل ساحر شمشاد مرزا کی پیشہ ورانہ صلاحیتوں، قائدانہ کردار اور قومی دفاع کے لیے انجام دی گئی خدمات کو خراجِ تحسین پیش کیا۔ صدرِ مملکت نے ان کے مستقبل کے لیے نیک تمناؤں کا اظہار بھی کیا۔

اس سے قبل جنرل ساحر شمشاد مرزا نے وزیراعظم شہباز شریف سے وزیراعظم ہاؤس میں الوداعی ملاقات کی، جہاں وزیراعظم نے جنرل مرزا کی ملک و قوم کے لیے خدمات اور پیشہ ورانہ مہارت کو سراہا۔

خیال رہے کہ 27 ویں آئینی ترمیم کے بعد چیئرمین جوائنٹ چیفس آف اسٹاف کمیٹی کا عہدہ ختم کر دیا گیا ہے، اور جنرل ساحر شمشاد مرزا 27 نومبر 2025 کو مقررہ مدت پوری ہونے پر ریٹائر ہو جائیں گے۔ ان کے بعد اس عہدے پر کوئی نئی تعیناتی نہیں ہوگی۔