روس نے مسافر ٹرین کو ڈرون حملے کا نشانہ بنایا، یوکرینی ریلوے حکام کا دعویٰ

روس نے یوکرین اور پولینڈ کی سرحد کے انتہائی قریب ایک مسافر ٹرین کو ڈرون حملے کا نشانہ بنایا ہے، تاہم بروقت کارروائی کے باعث تمام مسافر محفوظ رہے اور کوئی جانی نقصان نہیں ہوا۔ یوکرینی ریلوے حکام کے مطابق یہ حملہ پولینڈ کی سرحد سے محض 2 کلومیٹر کے فاصلے پر پیش آیا، جہاں ڈرون نے اس اہم ریلوے روٹ کو نشانہ بنایا جو کیف سے یورپ واپس جانے والے غیر ملکی سفارتی وفود کی ترسیل کے لیے استعمال کیا جاتا ہے۔

سنسنی خیز انکشافات کے مطابق اس حملے سے چند منٹ قبل سابق برطانوی وزیراعظم بورس جانسن، سابق سویڈش وزیراعظم کارل بلڈٹ اور دیگر اعلیٰ یورپی شخصیات اسی روٹ سے ایک سفارتی ٹرین کے ذریعے یورپ روانہ ہوئی تھیں۔ جس مسافر ٹرین کو نشانہ بنایا گیا، وہ سفارتی ٹرین کے کچھ ہی دیر بعد روانہ ہوئی تھی، تاہم ڈرون کو قریب آتے دیکھ کر ٹرین کو فوراً خالی کرا لیا گیا۔ یوکرینی ریلوے آپریٹر نے خدشہ ظاہر کیا ہے کہ روسی ڈرون کا اصل ہدف وہی سفارتی ٹرین تھی، جو ممکنہ خطرے کے پیشِ نظر اپنے مقررہ ٹائم ٹیبل سے پہلے ہی روانہ کر دی گئی تھی۔