ایران کا اقوام متحدہ سے اسرائیلی جرائم کیخلاف فوری قانونی کارروائی کا مطالبہ

ایران کی اعلیٰ انسانی حقوق کونسل نے اقوامِ متحدہ سے فوری مداخلت کا مطالبہ کرتے ہوئے کہا ہے کہ وہ لبنان میں عام شہریوں کے تحفظ، اسرائیلی خلاف ورزیوں کی دستاویز بندی اور جاری اسرائیلی حملوں کے دوران مبینہ جنگی جرائم کے خلاف قانونی کارروائی کے لیے ہنگامی اقدامات کرے۔ ایرانی انسانی حقوق کے ادارے کی جانب سے جاری کردہ رسمی بیان میں کہا گیا ہے کہ اسرائیلی فوج کے حالیہ اور مسلسل حملوں کے نتیجے میں خواتین اور بچوں سمیت درجنوں شہری جاں بحق اور زخمی ہو چکے ہیں، جبکہ عالمی برادری کی مجرمانہ خاموشی اور شہریوں کو مزید جانی نقصان سے بچانے کے لیے مؤثر اقدامات کی عدم موجودگی پر شدید تشویش کا اظہار کیا گیا ہے۔

بیان میں اس بات پر زور دیا گیا کہ سویلین آبادی اور رہائشی علاقوں کو براہِ راست نشانہ بنانا بنیادی انسانی حقوق، بالخصوص زندگی کے حق، تحفظ اور انسانی وقار کی سنگین خلاف ورزی ہے۔ مزید برآں، ایرانی کونسل نے مؤقف اختیار کیا کہ اسرائیل کی یہ اندھا دھند بمباری مسلح تنازعات کے دوران فوجی اور شہری اہداف میں فرق رکھنے اور طاقت کے متناسب استعمال جیسے بین الاقوامی انسانی حقوق کے بنیادی قوانین کی صریحاً دھجیاں اڑانے کے مترادف ہے۔