یوکرین اور مغربی ممالک روس کے خلاف ہائبرڈ جنگ میں ملوث ہیں: روسی سفیر کا دعویٰ

اسلام آباد میں میڈیا بریفنگ کے دوران روسی سفیر البرٹ خوریف نے دعویٰ کیا ہے کہ یوکرین اپنے مغربی سرپرستوں کے ساتھ مل کر روس کے خلاف مکمل پیمانے کی ہائبرڈ جنگ جاری رکھے ہوئے ہے اور کیف حکومت نے روسی شہریوں کو خوفزدہ کرنے کے لیے دہشت گردانہ حکمت عملی اپنا رکھی ہے۔ روسی سفیر کے مطابق 2022 سے 2025 کے دوران یوکرین کو فراہم کی جانے والی مغربی فوجی امداد 160 ارب ڈالر سے تجاوز کر چکی ہے اور 54 ممالک اس کی معاونت کر رہے ہیں۔ انہوں نے واضح کیا کہ مغربی پابندیاں روسی معیشت کو تباہ کرنے میں ناکام رہی ہیں، جبکہ اس کے برعکس خود یورپی یونین کو 1 سے 1.6 ٹریلین یورو تک کا نقصان اٹھانا پڑا ہے۔ روسی سفیر نے الزام عائد کیا کہ مغربی ممالک بین الاقوامی بحری قانون کی خلاف ورزی کر رہے ہیں، تاہم انہوں نے اس بات کا بھی اعادہ کیا کہ روس یوکرینی بحران کے سیاسی اور سفارتی حل کے لیے مذاکرات دوبارہ شروع کرنے پر آمادہ ہے۔