روسی اسٹیٹ ڈوما کے الیکشن: صدر پوتن کی حامی جماعت یونائیٹڈ رشیا کو واضح برتری

روس کی پارلیمنٹ کے ایوانِ زیریں (اسٹیٹ ڈوما) کے انتخابات میں صدر ولادیمیر پوتن کی حامی حکمران جماعت ‘یونائیٹڈ رشیا’ 57.86 فیصد ووٹ حاصل کر کے پہلے نمبر پر موجود ہے۔ مرکزی الیکشن کمیشن کی جانب سے جاری کردہ اعداد و شمار کے مطابق اب تک 90.43 فیصد ووٹوں کی گنتی مکمل ہو چکی ہے، جس میں حکمران جماعت کو اپنے حریفوں پر واضح برتری حاصل ہے۔

نتائج کے مطابق ‘کمیونسٹ پارٹی آف دی رشین فیڈریشن’ 13.84 فیصد ووٹوں کے ساتھ دوسرے جبکہ ‘لبرل ڈیموکریٹک پارٹی آف رشیا’ 8.9 فیصد ووٹوں کے ساتھ تیسرے نمبر پر ہے۔ اس کے علاوہ ‘نیو پیپل پارٹی’ نے 7.94 فیصد اور ‘اے جسٹ رشیا پارٹی’ نے 4.95 فیصد ووٹ حاصل کیے ہیں۔ الیکشن کمیشن کے مطابق ووٹوں کی گنتی کا عمل تاحال جاری ہے اور حتمی نتائج کا باضابطہ اعلان جلد کیا جائے گا۔