روس میں پارلیمانی انتخابات: پیوٹن کی حامی جماعت یونائیٹڈ رشیا کی ریکارڈ کامیابی

روس میں منعقد ہونے والے پارلیمانی انتخابات کے حتمی نتائج کے مطابق صدر ولادی میر پیوٹن کی حامی حکمران جماعت ‘یونائیٹڈ رشیا’ نے تاریخی اور ریکارڈ کامیابی حاصل کر لی ہے۔ 95 فیصد سے زائد ووٹوں کی گنتی کے مطابق یونائیٹڈ رشیا نے 57.83 فیصد ووٹ حاصل کرتے ہوئے 450 رکنی ایوان (اسٹیٹ ڈوما) میں 355 نشستیں جیت لی ہیں، جو کہ ایوان کی مجموعی نشستوں کا تقریباً 80 فیصد بنتی ہیں۔ پارلیمنٹ میں داخل ہونے والی دیگر چاروں جماعتیں بھی ماضی میں اہم قومی امور اور قانون سازی پر حکومتی پالیسیوں کی حمایت کرتی رہی ہیں۔

یوکرین جنگ کے خلاف کھل کر موقف رکھنے والی واحد رجسٹرڈ اپوزیشن جماعت ‘یابلوکو’ (Yabloko) قومی پارلیمنٹ میں کوئی نشست حاصل کرنے میں ناکام رہی، تاہم وہ نووگورود کی علاقائی اسمبلی میں 5 فیصد کی حد عبور کر کے معمولی نمائندگی حاصل کرنے میں کامیاب رہی۔ صدر ولادی میر پیوٹن نے ان انتخابات کو یوکرین جنگ اور اپنی پالیسیوں کے لیے عوامی حمایت کا اہم امتحان قرار دیا تھا، جبکہ اپوزیشن حلقوں کی جانب سے انتخابی عمل اور ووٹنگ میں دھاندلی کے شدید الزامات عائد کیے گئے ہیں۔ تاہم، روسی انتخابی حکام نے تمام تر الزامات کو مسترد کرتے ہوئے انتخابات کو مکمل طور پر شفاف، آزادانہ اور منصفانہ قرار دیا ہے۔