پاک روس مال بردار ریل سروس منصوبے پر کام جاری ہے: روسی سفیر

پاکستان میں تعینات روسی سفیر البرٹ خوریف (Albert Khorev) نے انکشاف کیا ہے کہ روس اور پاکستان دونوں ممالک کے درمیان تجارتی روابط کو فروغ دینے کے لیے ماسکو سے فیصل آباد اور ماسکو سے کراچی کے راستوں پر پہلی ڈائریکٹ مال بردار (فریٹ) ریل سروس شروع کرنے کے اہم منصوبے پر کام کر رہے ہیں۔ اس کے علاوہ اس مجوزہ راہداری میں بیلاروس کی شمولیت کے امکان پر بھی پیش رفت کی جا رہی ہے۔

روسی اخبار ‘ازویستیا’ (Izvestia) کو دیے گئے ایک انٹرویو میں سفیر البرٹ خوریف نے بتایا کہ خطے میں پیش آنے والی جغرافیائی و سیاسی کشیدگی کے باعث 2025 اور 2026 کے اوائل میں اس بین الاقوامی ریل منصوبے پر عمل درآمد کو چند مرتبہ مؤخر کرنا پڑا۔ تاہم، اب دونوں ممالک اس منصوبے کو عملی جامہ پہنانے کے لیے پرعزم ہیں۔

روسی سفیر کے مطابق اس وقت اسلام آباد اور ماسکو مال برداری کی خدمات سے متعلق باہمی معاہدے کو حتمی شکل دینے میں مصروف ہیں، جبکہ اس روٹ میں شامل ملکوں کی ان نجی اور سرکاری کمپنیوں کی نشاندہی کا عمل بھی جاری ہے جو اس ریل راہداری کے ذریعے اپنے تجارتی سامان کی ترسیل میں دلچسپی رکھتی ہیں۔

البرٹ خوریف نے مزید کہا کہ اس منصوبے کا بنیادی مقصد روس کے دارالحکومت ماسکو اور پاکستان کے صنعتی و تجارتی مراکز فیصل آباد اور کراچی کے درمیان براہِ راست اور سستا ریل رابطہ قائم کرنا ہے، جبکہ بیلاروس کی اس میں شمولیت سے اس لاجسٹک کوریڈور کی افادیت مزید بڑھ جائے گی۔ دونوں جانب سے ضروری تجارتی، انتظامی اور ٹیکنیکل امور کو جلد از جلد حل کرنے کے لیے مسلسل گفتگو جاری ہے۔