روس کے یوکرین پر حملے، 30 افراد ہلاک، 90 سے زائد زخمی

روس اور یوکرین کے درمیان جاری جنگ میں اچانک شدت آ گئی ہے اور روس کی جانب سے یوکرینی شہروں پر کیے گئے حالیہ فضائی حملوں میں کم از کم 30 افراد ہلاک جبکہ 90 سے زائد زخمی ہو گئے ہیں۔

بین الاقوامی خبر رساں ایجنسی کے مطابق، روسی فوج نے یوکرین کے دارالحکومت کیف پر ڈرونز اور گائیڈڈ میزائلوں کی مدد سے ایک بہت بڑا حملہ کیا ہے۔ اس شدید ترین حملے کے نتیجے میں دارالحکومت کیف میں وسیع پیمانے پر تباہی ہوئی ہے اور تقریباً 130 رہائشی و کاروباری عمارتوں کو شدید نقصان پہنچا ہے۔

یوکرینی حکام نے حملے کی تصدیق کرتے ہوئے بتایا ہے کہ متاثرہ علاقوں میں ریسکیو ٹیموں کی جانب سے امدادی کارروائیاں اور ملبہ ہٹانے کا کام تیزی سے جاری ہے۔ حکام نے خدشہ ظاہر کیا ہے کہ ملبے تلے دبے افراد اور زخمیوں کی نازک حالت کے باعث ہلاکتوں کی تعداد میں مزید اضافہ ہو سکتا ہے۔

دوسری جانب، روسی حکام نے ان حملوں کے حوالے سے اپنا مؤقف بیان کرتے ہوئے دعویٰ کیا ہے کہ روسی افواج نے یوکرین میں عام شہریوں کو نہیں بلکہ خاص طور پر فوجی و توانائی کی تنصیبات اور اہم ہوائی اڈوں کو نشانہ بنایا ہے تاکہ یوکرینی فوج کی فضائی اور لاجسٹک صلاحیت کو کمزور کیا جا سکے۔