روس کا کینیڈا، فرانس اور پرتگال کے ساتھ عسکری معاہدے ختم کرنے کا اعلان

روس نے کینیڈا، فرانس اور پرتگال کے ساتھ عسکری تعاون کے تین معاہدے باضابطہ طور پر ختم کرنے کا اعلان کر دیا ہے۔ روسی وزیراعظم میخائل میشوسٹن کے دستخط سے جاری شدہ حکم نامہ حکومت کی سرکاری ویب سائٹ پر شائع کیا گیا ہے۔

غیر ملکی خبر ایجنسی کے مطابق حکم نامے میں بتایا گیا ہے کہ یہ تینوں معاہدے مختلف برسوں میں ماسکو میں طے پائے تھے۔ کینیڈا کے ساتھ فوجی نوعیت کے دوروں کا معاہدہ 20 نومبر 1989 ، فرانس کے ساتھ دفاعی تعاون کا معاہدہ 4 فروری 1994 جبکہ پرتگال کے ساتھ فوجی تعاون کا معاہدہ 4 اگست 2000 کو طے پایا تھا۔

حکم نامے میں ان تمام معاہدوں کا حوالہ دیتے ہوئے واضح کیا گیا کہ اب یہ تینوں معاہدے مؤثر طور پر ختم کر دیے گئے ہیں۔

مزید یہ کہ روس کی وزارتِ خارجہ کو ہدایت کی گئی ہے کہ وہ کینیڈا، فرانس اور پرتگال کو اس فیصلے سے باضابطہ طور پر آگاہ کرے۔