ملک میں پھیلائی جانے والی افواہیں ایک منظم سازش کا حصہ ہیں،عطاتارڑ

وفاقی وزیر اطلاعات عطا تارڑ نے پریس کانفرنس سے خطاب کرتے ہوئے کہا ہے کہ ملک میں پھیلائی جانے والی افواہیں ایک منظم سازش کا حصہ ہیں۔ انہوں نے کہا کہ پی ٹی آئی کا ملک دشمن عناصر سے گٹھ جوڑ بے نقاب ہو چکا ہے۔ ڈی جی آئی ایس پی آر نے سینئر صحافیوں کو سیکیورٹی صورتحال پر تفصیلی بریفنگ دی ہے، جبکہ افغانستان سے دراندازی روکنے کے لیے فوج کی بھرپور کارروائیاں جاری ہیں۔
عطا تارڑ کا کہنا تھا کہ خیبرپختونخوا حکومت کی کمزوریاں دراندازی کے واقعات میں اضافے کی بڑی وجہ ہیں۔ صوبے میں دہشتگردی کے چار ہزار سے زائد مقدمات میں فردِ جرم عائد نہیں ہو سکی، جبکہ پچھلے 12 سال میں مؤثر پراسیکیوشن نظام بھی قائم نہیں کیا جا سکا۔ انہوں نے کہا کہ خیبرپختونخوا میں پراسیکیوشن مکمل طور پر ناکام ہے اور یہ نظام صوبائی حکومت کے ماتحت ہے۔
وفاقی وزیر اطلاعات نے الزام عائد کیا کہ غیر قانونی نان کسٹم پیڈ گاڑیوں سے خزانے کو اربوں روپے کا نقصان پہنچ رہا ہے اور ان گاڑیوں کی رقم دہشتگردی میں استعمال ہورہی ہے۔ صوبے میں منشیات اسمگلنگ اور غیر قانونی مائننگ کو روکنے میں بھی خیبرپختونخوا حکومت بری طرح ناکام ہے۔ انہوں نے کہا کہ آج بھی خیبرپختونخوا میں پہاڑ کاٹے جارہے ہیں اور صوبائی حکومت مختلف مافیاز کی پشت پناہی کررہی ہے۔
عطا تارڑ نے کہا کہ بانی پی ٹی آئی کی تینوں بہنیں 9 مئی کو کورکمانڈر ہاؤس کے باہر موجود تھیں اور یہ بات کیمروں میں واضح نظر آتی ہے۔ انہوں نے کہا کہ بھارتی اور افغان چینلز پر پاکستان کے خلاف جھوٹا پروپیگنڈا کیا جارہا ہے، جبکہ پی ٹی آئی رہنما انہی پلیٹ فارمز پر پاکستان کو بدنام کرنے میں مصروف ہیں۔ انہوں نے سوال اٹھایا کہ کیا یہ لوگ بھارتی مظالم یا مقبوضہ کشمیر میں ہونے والی زیادتیوں پر کوئی بات کرتے ہیں؟
وفاقی وزیر اطلاعات نے کہا کہ 9 مئی حملے کا مقصد فوج کو کمزور کرنا تھا اور اس سازش کے تمام تانے بانے واضح ہو چکے ہیں۔ انہوں نے کہا کہ فوج کے خلاف افواہیں پھیلانے والے مخصوص اہداف رکھتے ہیں اور اینٹی پاکستان اکاؤنٹس بھارت اور افغانستان سے چلائے جارہے ہیں۔
انہوں نے مزید کہا کہ خیبرپختونخوا واحد صوبہ ہے جہاں ہزاروں نان کسٹم پیڈ گاڑیاں چل رہی ہیں اور منشیات اسمگلنگ بھی صوبائی حکومت کی نگرانی میں ہورہی ہے