آر ایس ایس کی بیرونی فنڈنگ، بھارتی معاشرہ ہندوتوا نظریہ کی نذر

بھارتیہ جنتا پارٹی (بی جے پی) کی سرپرستی اور خفیہ بیرونی فنڈنگ کے سہارے چلنے والی راشٹریہ سویم سیوک سنگھ (آر ایس ایس) سمیت تمام انتہا پسند ہندوتوا تنظیموں نے بھارتی معاشرے کو اپنی لپیٹ میں لے لیا ہے۔

بھارتی جریدے ‘دی وائر’ کی رپورٹ کے مطابق، مودی حکومت کی پالیسیوں پر براہِ راست اثر انداز ہونے والی انتہا پسند تنظیم آر ایس ایس کے ساتھ بھارتی حکومتی حلقوں کی اہم ترین شخصیات بھی گہری وفاداری رکھتی ہیں۔ رپورٹ میں انکشاف کیا گیا ہے کہ امریکہ میں قائم ‘انڈین ڈویلپمنٹ اینڈ ریلیف فنڈ’ نے 1995ء سے 2002ء تک آر ایس ایس کو باقاعدہ لاکھوں ڈالر منتقل کیے۔ اس بیرونی فنڈنگ کے نتیجے میں گجرات میں عیسائیوں پر تشدد اور 2002ء کے دوران مسلمانوں کے وحشیانہ قتل عام میں ان ہندوتوا تنظیموں کے ملوث ہونے کے واضح دستاویزی ثبوت بھی موجود ہیں۔ اس حوالے سے بھارتی سیاسی تجزیہ نگار راجو پارولیکر کا کہنا ہے کہ امریکہ، برطانیہ اور یورپ سمیت دنیا بھر میں ایسی دہشت گرد تنظیمیں اپنے خفیہ فنڈز اور نیٹ ورک رکھتی ہیں۔

ایک اور بھارتی جریدے ‘فرنٹ لائن’ کے مطابق، بیرونِ ملک فعال ہندو تنظیموں نے فلاح و بہبود اور ریلیف کے نام پر بھاری فنڈز اکٹھے کر کے آر ایس ایس کو منتقل کیے۔ دلچسپ بات یہ ہے کہ مودی حکومت نے غیر ملکی فنڈنگ کے نام پر عام فلاحی تنظیموں کے خلاف تو سخت ترین کارروائیاں کیں، لیکن انتہا پسند آر ایس ایس کو اس معاملے میں بالکل کھلی چھوٹ دے رکھی ہے۔

دوسری جانب، بھارتی جریدے ‘دی ٹیلی گراف’ نے انکشاف کیا ہے کہ آر ایس ایس نے مغربی بنگال میں نوجوان نسل کے اندر ہندوتوا کا شدت پسند نظریہ پھیلانے کے لیے باقاعدہ مہم شروع کر رکھی ہے، جہاں ڈھائی لاکھ نوجوانوں تک رسائی حاصل کرنے کے لیے میڈیکل اور انجینئرنگ کالجوں کے طلبہ کو نشانہ بنایا جا رہا ہے۔ بھارتی تجزیہ کار ڈاکٹر پنکج شریواستو کے مطابق، فنڈنگ کے ان خفیہ ذرائع کے بے نقاب ہونے کے خوف سے آر ایس ایس اب تک اپنی باقاعدہ رجسٹریشن کروانے سے فرار اختیار کیے ہوئے ہے اور مسلسل بھارتی معاشرے میں نظریاتی نفرت پھیلانے میں مصروف ہے۔