امریکا، ایران کشیدگی کم کرانے کے لیے قطری ثالث دوبارہ متحرک

ایران اور امریکہ کے درمیان بڑھتی ہوئی کشیدگی کو کم کرنے اور سفارتی تعطل کے خاتمے کے لیے ثالثی کرنے والے ممالک ایک بار پھر سرگرم ہو گئے ہیں، جس کے تحت قطری مذاکرات کاروں کا ایک وفد ایرانی حکام سے اہم بات چیت کے لیے تہران پہنچ گیا ہے۔ خبر ایجنسی کے مطابق، ان ملاقاتوں کا بنیادی مقصد دونوں ممالک کے درمیان وسیع تر مذاکرات کی بحالی کے لیے سازگار ماحول پیدا کرنا اور سفارتی روابط کو آگے بڑھانا ہے۔ ذرائع کا کہنا ہے کہ تہران میں ہونے والے ان مذاکرات کے دوران ایران اور امریکہ کے مابین ماضی میں طے پانے والی مفاہمتی یادداشت پر عمل درآمد کو یقینی بنانے پر بحث ہوگی، جبکہ خطے کی سکیورٹی، آبنائے ہرمز میں جہازرانی سے متعلق حالیہ تنازعات اور بحری آمد و رفت کے تحفظ جیسے اہم امور پر بھی تفصیلی تبادلہ خیال کیا جائے گا۔