قطر و مصر کے وزرائے خارجہ کے درمیان رابطہ، خطے کی تازہ صورتحال پر گفتگو

امریکہ اور ایران کے درمیان بڑھتے ہوئے فوجی تصادم اور خلیج میں پیدا ہونے والی سنگین صورتحال کے بعد عرب دنیا کے کلیدی ممالک نے خطے کو بڑی تباہی سے بچانے کے لیے سفارتی کوششیں تیز کر دی ہیں۔ سعودی عرب کے بعد اب قطر کے وزیراعظم اور وزیر خارجہ شیخ محمد بن عبدالرحمان بن جاسم الثانی نے مصر کے وزیر خارجہ بدر عبدالعاطی سے ایک اہم ٹیلیفونک رابطہ کیا ہے۔

قطری وزارتِ خارجہ کی جانب سے جاری کردہ باضابطہ بیان کے مطابق، دونوں ممالک کے وزرائے خارجہ کے درمیان ہونے والی اس گفتگو کا بنیادی محور مشرقِ وسطیٰ کی مجموعی صورتحال رہی۔ یہ رابطہ امریکہ اور ایران کے درمیان طے پانے والی مفاہمتی یادداشت کے بعد پیدا ہونے والی حالیہ تزویراتی تبدیلیاں اور فوجی تناؤ کے تناظر میں کیا گیا ہے۔ قطری وزیراعظم شیخ محمد بن عبدالرحمان نے خطے کی سلامتی پر تشویش کا اظہار کرتے ہوئے اس بات پر سخت زور دیا کہ مشرقِ وسطیٰ کو کسی بھی قسم کے بلاجواز حملوں اور ان کے خطرناک نتائج سے محفوظ رکھنا اس وقت سب سے بڑی ترجیح ہونی چاہیے۔

انہوں نے عالمی معیشت اور بحری تجارت کے تحفظ کا حوالہ دیتے ہوئے کہا کہ آبنائے ہرمز (Strait of Hormuz) میں بین الاقوامی بحری آمدورفت کی آزادی کو ہر قیمت پر یقینی بنایا جانا ضروری ہے تاکہ سپلائی چین متاثر نہ ہو۔ قطری وزیراعظم نے مصر کے وزیر خارجہ سے بات کرتے ہوئے اعادہ کیا کہ موجودہ بحران کا حل صرف اور صرف سفارت کاری میں ہے۔ انہوں نے دونوں طاقتوں کے درمیان کشیدگی کو کم کرنے کے لیے مکالمے اور سفارتی چینلز کو مسلسل کھلا رکھنے اور اسی راستے پر آگے بڑھنے کی ضرورت پر زور دیا۔ مصری وزیر خارجہ نے بھی خطے میں امن و استحکام کے لیے قطر کی ان سفارتی کوششوں کو سراہا۔