پنجاب بھر میں انسداد پولیو مہم کا آج سے آغاز، 1 کروڑ 78 لاکھ بچوں کو قطرے پلانے کا ہدف مقرر

پنجاب بھر میں آج سے انسداد پولیو کی قومی مہم کا آغاز کر دیا گیا ہے جس کے دوران پانچ سال سے کم عمر ایک کروڑ 78 لاکھ بچوں کو پولیو سے بچاؤ کے حفاظتی قطرے پلانے کا ہدف مقرر کیا گیا ہے۔

پنجاب انسداد پولیو پروگرام کے مطابق اس مہم میں صوبے بھر سے دو لاکھ سے زائد پولیو ورکرز حصہ لے رہے ہیں جو گھر گھر جا کر بچوں کو پولیو کے قطرے پلائیں گے۔

پنجاب انسداد پولیو پروگرام کے ترجمان عدیل تصور نے بتایا کہ یہ مہم پولیو وائرس کے خلاف دباؤ برقرار رکھنے کے لیے نہایت اہم ہے۔ ان کا کہنا تھا کہ حالیہ عرصے میں پولیو وائرس کے کیسز میں واضح کمی سامنے آئی ہے جو اس بات کا ثبوت ہے کہ انسداد پولیو مہمات مؤثر ثابت ہو رہی ہیں، تاہم وائرس کے مکمل خاتمے کے لیے رفتار، تسلسل اور دباؤ برقرار رکھنا ناگزیر ہے۔

عدیل تصور کے مطابق لاہور میں 14 ہزار جبکہ راولپنڈی میں 8 ہزار پولیو ورکرز اس قومی مہم میں حصہ لیں گے۔ راولپنڈی، مری اور صوبے کے دیگر حساس اور ہائی رسک اضلاع میں خصوصی حکمت عملی کے تحت مہم چلائی جائے گی۔

انہوں نے مزید کہا کہ نقل مکانی کرنے والی آبادی پر بھی خصوصی توجہ دی جا رہی ہے تاکہ کوئی بچہ پولیو کے حفاظتی قطرے پینے سے محروم نہ رہے۔