پنجاب بھر میں دفعہ 144 نافذ؛ محکمہ داخلہ نے نوٹیفیکیشن جاری کر دیا

محکمہ داخلہ پنجاب نے موجودہ موسمی حالات اور شدید مون سون بارشوں کے پیشِ نظر قیمتی انسانی جانوں کے تحفظ کے لیے صوبے بھر میں دفعہ 144 نافذ کر دی ہے۔ جاری کردہ نوٹیفکیشن کے مطابق پنجاب کے تمام ڈیموں، دریاؤں، نہروں، تالابوں اور جھیلوں میں تیراکی کے علاوہ بلا اجازت کشتی رانی پر مکمل پابندی ہوگی، جبکہ گلیوں، سڑکوں اور کھلے مقامات پر بارش کے جمع شدہ پانی میں نہانے کو بھی جرم قرار دیا گیا ہے۔ ترجمان محکمہ داخلہ کا کہنا ہے کہ نہروں اور دریاؤں میں پانی کی سطح بلند ہونے کے باعث بچوں اور نوجوانوں کے ڈوبنے کے شدید خطرات لاحق ہیں۔ سیکرٹری داخلہ پنجاب نے ضابطہ فوجداری کے تحت یہ پابندیاں 60 روز کے لیے عائد کی ہیں اور مقامی انتظامیہ سمیت قانون نافذ کرنے والے اداروں کو حکم نامے پر بلا تاخیر اور سخت عملدرآمد یقینی بنانے کی ہدایت کی گئی ہے۔