پنجاب میں دفعہ 144 کے نفاذ میں توسیع، ڈرون اُڑانے پر پابندی برقرار

حکومتِ پنجاب نے سیکیورٹی خدشات کے پیش نظر صوبے بھر میں دفعہ 144 کے تحت کھلی فضا (آؤٹ ڈور) میں ڈرون اڑانے پر عائد پابندی میں مزید 30 روز کی توسیع کر دی ہے۔ محکمہ داخلہ پنجاب کے جاری کردہ اعلامیے کے مطابق ہالز اور مارکیز کے اندر محدود استعمال کے علاوہ عام آؤٹ ڈور ڈرون کیمروں کے استعمال پر مکمل پابندی برقرار رہے گی، جبکہ انٹیلی جنس اور قانون نافذ کرنے والے ادارے اس سے مستثنیٰ ہوں گے۔ ترجمان کے مطابق زرعی، آبپاشی اور تحقیقی مقاصد کے لیے ڈرون کے محفوظ استعمال کی تحریری اجازت دینے کی خاطر ضلعی سطح پر “سیف ڈرون یوزیج کمیٹی” تشکیل دے دی گئی ہے، جس کی منظوری سے ڈرون کا استعمال ممکن ہو سکے گا۔