وزیرِ تعلیم پنجاب کا اسکولوں میں بچوں کو خود پڑھانے کا اعلان؟ کون سے مضامین پڑھائیں گے؟

وزیراعلیٰ پنجاب کی خصوصی ہدایت پر صوبائی وزیرِ تعلیم رانا سکندر حیات نے ایک احسن قدم اٹھاتے ہوئے سرکاری اسکولوں میں خود تدریسی خدمات انجام دینے کا اعلان کر دیا ہے۔ وزیرِ تعلیم نے واضح کیا کہ وہ باقاعدہ استاد بن کر ستمبر کے پہلے ہفتے سے بچوں کو پڑھانا شروع کریں گے، جس کا بنیادی مقصد اسکولوں کے عملی مسائل کو موقع پر سمجھنا اور تدریسی معیار کا جائزہ لینا ہے۔ انہوں نے بتایا کہ انگلش اور کیمسٹری ان کے پسندیدہ مضامین ہیں، لہٰذا وہ پرائمری اسکولوں میں انگلش اور ہائی اسکولوں میں کیمسٹری پڑھانے سے شروعات کریں گے۔ رانا سکندر حیات نے اس مہم کو شفاف اور مؤثر بنانے کے لیے ہر ہفتے بغیر کسی پیشگی اطلاع کے مختلف اسکولوں کے سرپرائز دورے کرنے کا فیصلہ کیا ہے۔ انہوں نے امید ظاہر کی کہ اس اقدام سے اساتذہ اور طلبہ کے ساتھ براہِ راست رابطہ قائم ہوگا اور سرکاری اسکولوں کو معیاری بنانے کی مہم میں تیزی آئے گی۔