بھارت؛ 3 سالہ بچی کو جنسی زیادتی کا نشانہ بنانے والے 65 سالہ درندے کو سزائے موت

بھارتی ریاست مہاراشٹر کے شہر پونے کی ضلعی اور سیشن عدالت نے ایک انتہائی لرزہ خیز مقدمے میں تاریخی فیصلہ سناتے ہوئے 65 سالہ ملزم بھیم راؤ کامبل کو 3 سالہ معصوم بچی کے اغوا، جنسی زیادتی اور بہیمانہ قتل کے جرم میں سزائے موت سنا دی ہے۔ عدالت نے اپنے فیصلے میں اس واقعے کو ہولناک ترین قرار دیتے ہوئے ریمارکس دیے کہ یہ جرم معاشرے کے اجتماعی ضمیر کو جھنجھوڑ دینے کے لیے کافی ہے۔

پولیس ریکارڈ کے مطابق یہ افسوسناک واقعہ رواں سال یکم مئی کو پیش آیا تھا۔ سفاک ملزم بھیم راؤ کامبل نے ایک 3 سالہ معصوم بچی کو کھانے پینے کی اشیا دینے اور گائے کا نومولود بچھڑا دکھانے کا بہانہ بنایا اور اسے پھسلا کر مویشیوں کے باڑے میں لے گیا۔ وہاں ملزم نے بچی کو درندگی کا نشانہ بنایا اور بعد میں اسے قتل کر دیا۔ بچی کے لاپتہ ہونے پر جب اہلِ خانہ نے پولیس کو اطلاع دی، تو علاقے کی سی سی ٹی وی (CCTV) کیمروں کی فوٹیج چیک کی گئی، جس میں ملزم بچی کو اپنے ساتھ لے جاتا ہوا صاف نظر آیا۔ پولیس نے اسی ٹھوس دستاویزی ثبوت کی بنیاد پر ملزم کو گرفتار کیا تھا۔

مقدمے کی سماعت کے دوران استغاثہ نے بھارتی سپریم کورٹ کے متعدد تاریخی فیصلوں کا حوالہ دیتے ہوئے مؤقف اختیار کیا کہ جرم کی نوعیت اور سنگینی کو دیکھتے ہوئے ملزم کو سزائے موت سے کم کوئی سزا نہیں دی جا سکتی۔ سیشن کورٹ کے جج نے اس مؤقف سے مکمل اتفاق کرتے ہوئے کہا کہ مقتولہ کے جسم پر موجود زخم ملزم کے غیر انسانی تشدد کی عکاسی کرتے ہیں۔

ملزم بھیم راؤ کامبل اس سے قبل بھی ایک جنسی جرم کے مقدمے میں ملوث رہ چکا ہے، جس کا مطلب ہے کہ وہ عادی مجرم ہے۔  ہولناک جرم کے ارتکاب کے باوجود ملزم نے پورے مقدمے کے دوران اپنے کیے پر کسی قسم کے پچھتاوے یا شرمندگی کا اظہار نہیں کیا۔  عدالت نے چند روز قبل ہی ملزم پر اغوا، زیادتی اور قتل کے الزامات کے تحت جرم ثابت ہونے پر اسے مجرم قرار دیا تھا، جس کی حتمی سزا سناتے ہوئے اب اسے پھانسی کا حکم دے دیا گیا ہے تاکہ معاشرے میں ایسی درندگی کا سدِباب ہو سکے۔