سہیل آفریدی کا اسلام آباد ہائیکورٹ اور اڈیالہ جیل کے باہر احتجاج کا اعلان

خیبرپختونخوا کے وزیراعلیٰ محمد سہیل آفریدی نے پاکستان تحریک انصاف (پی ٹی آئی) کے بانی عمران خان کی رہائی کے لیے ہر منگل کو اسلام آباد میں اراکین اسمبلی کے احتجاج اور 27 دسمبر کو پشاور میں بڑے جلسے کا اعلان بھی کر دیا۔

وزیراعلیٰ نے پشاور میں دعائیہ تقریب سے خطاب کرتے ہوئے کہا کہ آج کا دن ہمارے لیے دردناک اور غمناک ہے، پرامن کارکنوں پر تشدد کیا گیا اور گولیاں چلائی گئیں۔ ان کا کہنا تھا کہ پی ٹی آئی کے کارکنوں پر تشدد پہلی بار نہیں ہوا، اور کچھ طاقتور لوگ عوام کو بھیڑ بکریاں سمجھ رہے ہیں۔

سہیل آفریدی نے عدلیہ کی موجودہ صورتحال پر تشویش کا اظہار کرتے ہوئے کہا کہ آئین و قانون کے دائرے میں رہ کر حق استعمال کرنا ہے، جبکہ کچھ لوگ انتشار چاہتے ہیں۔

وزیراعلیٰ نے مزید کہا کہ 9 مئی اور 26 نومبر کو ہم پرامن تھے اور آئندہ بھی پرامن رہیں گے، لیکن قربانی رائیگاں نہیں جانے دیں گے۔ انہوں نے اعلان کیا کہ ہر منگل کو اراکین اسمبلی اسلام آباد میں احتجاج کے لیے ایوان سے باہر ہوں گے، اور جو رکن نہ پہنچے اسے ملامت کی جائے گی۔

سہیل آفریدی نے کہا کہ وہ اڈیالہ جیل کے باہر بھی جمعرات کو پہنچیں گے جب تک عمران خان سے ملاقات نہیں ہوتی۔ انہوں نے زور دیا کہ 7 دسمبر کو پشاور میں ہونے والے جلسے میں کسی کو گولیاں چلانے کی اجازت نہیں دی جائے گی۔