کراچی میں فوارہ چوک پر تحریک انصاف کا احتجاج، پولیس کی شیلنگ، متعدد کارکن زیرحراست 

کراچی میں فوارہ چوک کے قریب تحریک انصاف کے کارکنوں نے احتجاج کیا جس کے دوران پولیس اور مظاہرین کے درمیان کشیدگی پیدا ہوگئی۔

پولیس کے مطابق تحریک انصاف کی جانب سے احتجاج کے لیے پیشگی اجازت نہیں لی گئی تھی۔ حکام کا کہنا ہے کہ مظاہرین نے پولیس پر پتھراؤ کیا، جس کے بعد صورت حال کو قابو میں لانے کے لیے آنسو گیس کی شیلنگ کی گئی۔

پولیس حکام نے بتایا کہ کارروائی کے دوران پندرہ سے زائد افراد کو حراست میں لیا گیا ہے، جن کے خلاف قانون کے مطابق کارروائی عمل میں لائی جائے گی۔

دوسری جانب تحریک انصاف کراچی ڈویژن کے صدر راجا اظہر نے پولیس کی کارروائی کو سخت تنقید کا نشانہ بناتے ہوئے کہا کہ کارکنوں پر تشدد اور پولیس گردی قابل مذمت ہے۔

ایس ایس پی ساؤتھ مہزور علی نے میڈیا سے گفتگو میں مؤقف اختیار کیا کہ احتجاج غیر قانونی تھا اور مظاہرین کی جانب سے پتھراؤ کے بعد پولیس کو کارروائی کرنا پڑی۔