قائمہ کمیٹیوں میں واپسی کا فیصلہ بانی پی ٹی آئی کی منظوری سے مشروط

پاکستان تحریکِ انصاف (پی ٹی آئی) کی پارلیمانی قائمہ کمیٹیوں میں واپسی کے معاملے پر پارٹی کی سینئر قیادت نے تمام تر اختیارات بانی پی ٹی آئی عمران خان کی منظوری سے مشروط کر دیے ہیں۔ ذرائع کے مطابق سینیٹ اور قومی اسمبلی میں پی ٹی آئی کے بیشتر ارکان اسمبلی کمیٹیوں کے اجلاسوں میں دوبارہ فعال شمولیت کے خواہشمند ہیں اور اس حوالے سے متعدد ارکان نے اپوزیشن لیڈرز اور پارٹی کی سینئر قیادت کے سامنے تجاویز بھی رکھی ہیں۔ تاہم پارٹی قیادت نے ارکان کو واضح کیا ہے کہ قائمہ کمیٹیوں میں واپسی یا بائیکاٹ سے متعلق فیصلہ ان کے دائرہ اختیار میں نہیں ہے۔ ذرائع کا کہنا ہے کہ بانی پی ٹی آئی سے آئندہ ہونے والی ملاقات میں یہ تجویز باقاعدہ طور پر پیش کی جائے گی، جس کے بعد ان کی ہدایات کی روشنی میں حتمی اور باضابطہ فیصلہ کیا جائے گا۔