عمران خان سے بہنوں ، وکلا کی ملاقات ، پی ٹی آئی کا ورکروں کو جیل نہ بھیجنے کا فیصلہ 

اسلام آباد: پاکستان تحریک انصاف نے فیصلہ کیا ہے کہ پارٹی ورکرز کو بانی چیئرمین عمران خان کی بہنوں یا وکلا کے ہمراہ جیل ملاقات کیلئے نہیں بھیجا جائے گا۔ یہ فیصلہ اپوزیشن اتحاد کے پارلیمانی پارٹی اجلاس میں کیا گیا، جس کی اندرونی تفصیلات پیر کے روز سامنے آئیں۔

ذرائع کے مطابق اجلاس میں اڈیالہ جیل میں عمران خان سے ملاقات کے طریقہ کار پر تفصیلی مشاورت ہوئی۔ مشترکہ طور پر طے پایا کہ منگل کے روز کوئی ورکر بہنوں یا وکلا کے ساتھ جیل نہیں جائے گا تاکہ حکومت کو کریک ڈاؤن یا رکاوٹ کا کوئی جواز نہ ملے۔

اجلاس میں محمود خان اچکزئی اور دیگر قائدین نے ہدایت کی کہ اسپیکر کو مؤقف پہنچانے کیلئے ایڈوائزری کمیٹی میں جانا ضروری ہے۔ پارلیمانی پارٹی نے فیصلہ کیا کہ تمام متعلقہ دستاویزات اسپیکر چیمبر میں پہنچائی جائیں گی۔

مشترکہ اجلاس کے بعد گفتگو کرتے ہوئے چیئرمین پی ٹی آئی بیرسٹر گوہر علی خان نے کہا کہ پی ٹی آئی نے کبھی مذاکرات سے انکار نہیں کیا اور ہمیشہ معاملات افہام و تفہیم سے حل کرنے کی کوشش کی ہے۔ انہوں نے کہا کہ مضبوط فوج پاکستان کی ضامن ہے اور تحریک انصاف ہمیشہ اس مؤقف پر قائم رہی ہے۔

بیرسٹر گوہر نے کہا کہ کچھ عناصر اداروں اور پی ٹی آئی کے درمیان غلط فہمیاں برقرار رکھنا چاہتے ہیں۔ جو لوگ اس دراڑ کے فائدہ اٹھانے والے ہیں، وہی کشیدگی بڑھانے کی کوشش کرتے ہیں۔ انہوں نے کہا کہ جو کچھ ہوا وہ غلط ہوا، اور ایسا نہیں ہونا چاہیے تھا۔