پی ٹی آئی ناراض ارکان کا بیرسٹر گوہر کو خط، مائنس عمران خان کوششوں کا انکشاف

پاکستان تحریک انصاف (پی ٹی آئی) کے ناراض ارکانِ اسمبلی نے پارٹی چیئرمین بیرسٹر گوہر علی خان کو ایک خط ارسال کیا ہے، جس میں انکشاف کیا گیا ہے کہ خیبر پختونخوا کی صوبائی حکومت کی جانب سے مختلف مواقع پر بانی چیئرمین عمران خان کو دانستہ طور پر مائنس کرنے کی کوشش کی جا رہی ہے۔ خط میں ناراض اراکین نے مؤقف اپنایا ہے کہ صوبائی اسمبلی میں تشکیل دی گئی ‘رہائی تحریک’ کا واحد ایجنڈا عمران خان کی رہائی ہے، تاہم مرکزی قیادت اس حوالے سے بااثر اور جامع لائحہ عمل بنانے میں ناکام رہی ہے۔ ارکان نے شکوہ کیا کہ علامہ ناصر عباس اور محمود خان اچکزئی سے ملاقات کی یقین دہانی پر بھی عمل نہیں ہوا۔ اس کے علاوہ پشاور پریمیئر لیگ کی تقریب میں قائد کی تصویر نہ ہونے اور اپوزیشن جماعتوں مسلم لیگ (ن) اور پیپلز پارٹی کو بجٹ فنڈز و سرکاری تقریبات میں غیر معمولی اہمیت دینے پر شدید تشویش کا اظہار کرتے ہوئے قیادت سے فوری ملاقات کا مطالبہ کیا گیا ہے۔